Ons Kersfees!

Ek moet drasties begin om hierdie blog op datum te hou!  Ek sal elke dag ietsie laai totdat ons weer op datum is.  Daar het so baie gebeur intussen en ek vergeet wat ek alles wou neergeskryf het.  Siende dat dit eintlik die hele idee van my blog is, maak dit my nogal ongelukkig.

 

Ons was Kersfees Marloth Park toe saam met Oupa Japie en Ouma Santie.  Ons en die kinders het dit ongelooflik baie geniet.  Franzél vra nou nog wanneer gaan ons weer na ons wildtuin-huisie toe.

 

 

Op pad wildtuin toe.  Hierdie is geneem tussen Machado-dorp en Waterval Boven.  En ja Wihan soek sy ma, die rede vir die uitgestrekte hande en die huil-gesiggie!  Wat is nuut?

 

 

Ons moes dalk die kamers afgeneem het voor ons begin aflaai het!!  Maar dit was so lekker ingerig en mooi dat ek die foto nogsteeds hier moet op sit.  Dit was regtig 'n fantastiese plek gewees.

 

Eet ons pap met 'n uitsig.  Kort hierna het die vark op ons stoep gepiepie!! Ieeeeuw!

 

Ons houtdek waar die diere tot by ons kon kom sonder om op ons tone te trap!  Franzel is in ekstase as die zebras so tot by haar kom en kos by haar vat.

 

Dit lyk of die Zebra Ouma vir 'n soentjie vra...

 

 

Ag dankie, Ouma!

 

 Wihan was natuurlik baie bam daai zebra!

 

 

Ons swembadjie.  Dit was 'n wenner! Let op na Wihan wat eenkant sit met sy klere en skoene aan!  Dit het 'n rukkie se soebat en smeek gevat om hom in die water te kry...

 

Daar's hy!  Nou kan ons letterlik heeldag swem!

 

Lekker slaap ons saam in 'n bed. 

 

Een van die kere in Kruger Wildtuin toe.

 

Piekniek by ... kan nie die plek se naam onthou nie!  Sal moet uitvind...

 

Kersfees en Wihan wurg amper vir Mamma so bam hy Kersvader.

 

Op pad huis toe by die Nzasm valle in Waterval Boven.

En al Boeta se streke is saam op verlof!  Hierdie was een hele splinternuwe buisie sonroom...

 



 

Die "Manga slang" (Zellie se uitvindsel!) het amper hierdie knapie gepik.  Ons het hom gered deur die slang eers met 'n klip te gooi en toe het hierdie dapper (dom) outjie hom uit die boom uit gaan haal en weggevat.

 

Ons kan nie wag om weer Marloth Park toe te gaan nie.  Mis dit sommer as ek die foto's so deur kyk en kan nie glo dis al so lankal verby na ons so lank daarna uitgesien het nie.

 

 

Dankie Ouma en Oupa... Ons het dit baie geniet.

 



Arme vakansieskoolkinders...

Daar is darem nie 'n aakliger tyd om jou kinders by 'n skool te moet gaan aflaai as Desember nie.  Die hele wêreld en sy maats is op vakansie of lê lekker by die huis rond en hulle moet elke liewe oggend soos gewoonlik skool toe gaan.  Daar is omtrent 50 kinders in die hele skool, hulle gewone maatjies is nie daar nie, die juffrouens is geirriteerd omdat hulle daar moet wees en daar is net mooi niks om hulle besig te hou nie.  Hulle kyk of tv of speel buite en dis dit.  Op 'n dag soos vandag sit hulle heel dag op die klipharde bankies en tv kyk en as hulle dit waag om te gesels skreeu iemand op hulle, want die ander maatjies kan nie hoor nie.  Kan daar 'n groter straf wees vir 'n kind.  Ek kan nie dink hoe my mannetjie volgende jaar daar bo gaan reg kom nie.  Hy kyk glad nie eers tv nie!!  Hy sal doodgaan as hy die hele dag daar moet kierts regop sit en tv kyk.

Arme Sussa was so ver in haar hele skool loopbaan net drie weke nie in vakansies by die skool nie.  Ons hou buite seisoen vakansie en ons kan nie elke skoolvakansie af vat nie.  Selfs met my wat van die huis af werk kan ek hulle nie hier hou en enige vorm van werk gedoen kry nie.  Veral Boeta los my nie vir 'n sekonde uit nie.  En hy is nie meer dom nie, so ek kan nie meer vir Sussa uit hou en hom alleen skool toe stuur nie.  Hy freak behoorlik uit, want hy weet sy is by die huis en hy moet skool toe gaan.  Nou dat hulle boonop bo gaan speel sal hy onmiddelik sien sy is nie by die skool nie, maar hy is.

Vandag voel ek sommer net super sleg, want Boeta was nou regtig glad nie lus om in te gaan nie.  Die ou voetjies sleep sommer al van die hek af.  Toe ek by die huis die sleutel vat begin hy sommer dadelik huil "nie ly nie, nie ly nie".  Weet al dit beteken skool toe...

Eendag as ek groot is gaan ek glad nie nodig hê om te werk nie....  Net jammer my kinders sal dan ook al groot wees en dit gaan hulle niks help nie, ne....

Boeta en die Reuse Skilpad

Vriende van ons is besig om aan hulle huis te bou en breek en ons pas hulle honde en skilpad op terwyl die bouers heeldag in en uit is.  Dinsdag middag kom laai hulle die diere af en sit die skilpad sommer net daar in die middel van die grasperk neer.  Dit is 'n reuse skilpad, nie een van hierdie kleintjies nie.

Wihan is besig om te speel en ek stap saam met die mense uit hek toe en ewe skielik hoor ons net hierdie histeriese bloedstollende gille!  Boeta wou nog so ewe rustig agter ons aan stap en toe hy reg by hierdie groot klip is steek hy sy kop en pote uit en begin hol so vinnig as wat 'n skilpad kan hol!  Boeta storm tot by die agterdeur wat toe is en daar is hy vasgekeur met hierdie groteske monster wat hy vas glo reguit op hom afpyl!  Toe ek hom uiteindelik optel was hy heeltemal histeries en kon nie eers gesê kry wat hy probeer sê nie!  Hy het my net vasgegryp en sulke snak-na-asem geluide gemaak terwyl hy snik soos hy huil!  Nou is dit natuurlik 'n.... wag vir dit..... bam skilpad!!

En julle gaan my nou wraggies nie glo nie, maar gister middag terwyl hy nog so ewe dood rustig op die mat sit en speel waar hy veilig is van die bam skilpad kom hier 'n helse groot bosduif in die huis in gevlieg en hy pyl natuurlik reg op Boeta af!  Weereens absolute histerie.  En elke keer hol Wihan en vlieg die duif in dieselfde rigting en as Wihan stop is die ding langs hom!!  Ek dink nie my kind gaan sy 3de verjaarsdag haal met die huidige wildernis situasie om ons huis nie!!  En natuurlik is dit nou 'n bam duib!!

En toe ek uiteindelik die duif by die deur uit het gryp die hond hom en Sussa raak ab-so-luut histeries.  Kos my soos 'n mal mens met 'n besem agter die hond aan hol, die duif in 'n wasgoedmandjie vang en hom oor die muur gooi waar die bure se hond hom kan eet sonder dat my arme sensitiewe bloedjie dit hoef te aanskou!!!

Goeie daad vir die maand done and dusted!!
 

"Growth spurt???"

Ek hoop regtig dat Boeta deur 'n ongelooflike vinnige groeifase gaan en nie van plan is om vir die res van sy lewe elke jaar bietjie meer te eet as wat hy nou eet nie!  Ons sal moet begin fondsinsamelings reël om sy maag vol te hou! 

Gisteraand het hy vandat hy 14:00 van die skool af gekom het tot slaaptyd die volgende geëet:
2 Snye volgraan brood;
1 perske;
4 marie koekies;
Groot stuk wors (en die helfte van sussa se groot stuk wors); 
Mash;
4 driehoek kasies;  (Ja 4, sy rekord is 8!)
2 Eiers (ek wou nie wors eet nie en hy het my eiers van my roosterbrood af geëet!)
1 Bakkie yoghurt;
'n Hand vol jelly tots;
En die helfte van my beker rooibos tee!!!

Sy sussie wat 3 jaar ouer is het 'n halwe stuk wors en 'n kasie geëet!!

Vanoggend voor skool:
Bakkie met 2 weetbix;
Sny volgraan brood;
2 Perskes.....
en hy het sy bakkie oats bestorm toe hy by die skool kom asof hy jare laas kos gehad het!!

Na my kind wat leef van vars lug en liefde is dit nogal 'n redelike aanpassing.  Ek wag net heeltyd dat hy moet naar word!!  G'n mens kan so baie kos in sy pens kry nie en Boeta se pensie is ook maar net so groot!